Историја | Водечка градежна компанија | Стентон Градба

Пецо Стојаноски, во фелата познат како Пеце Стентон е роден на 21.10.1966 година во с.Бучин, Општина Крушево.

Својата кариера ја започнал во средината на 80тите години, кога како млад трговец прв пат се сретнал со принципите на претприемништвото.

Во 1990 година ја основа компанијата Стентон ДООЕЛ Битола, чија прва дејност е трговијата, за подоцна да започне да се бави и со производство.

Во 2002 година се стекнува со концесионерско право за експлоатација на кварцен песок и чакал од рудникот во с.Брод, Општина Новаци.

Во 2003 година беше еден од основачите на градежната компанија Стентон Градба ДОО Битола, која се бави со нискоградба, хидроградба, изградба на индустриски комплекси и успешно брои преку 170 вработени, со што постигна лидерство од областа на градежништвото во регионот.

Во 2015 беше еден од основачите на Градежна комора на Македонија, каде во периодот од 2015 – 2017 година беше избран за потпретседател, а активно членуваше во истата до крајот на својот живот.

Од 2013 година беше член на Управен одбор на Сојузот на стопански комори на РМ.

Тој беше основач и извршен директор на Стентон ДОО Битола и Стентон Градба ДОО Битола, како и основач и член на раководните тела на низа успешни компании од различни дејности: СН Осигурителен Брокер АД Битола, СН Финансии ДОО Битола, СН Менувачница ДОО Битола, СНММ Инфо Медиа ДОО Битола, СН Сообраќаен Центар ДОО Битола, СН Центар за моторни Возила ДООЕЛ Битола и СН Угостителство ДООЕЛ Битола.

И покрај неговиот голем професионален ангажман, тој одвојувал значаел дел од своето време за подобрување на општеството преку членувањето во Ротари клубот Битола.

Неговата фирма Стентон Градба за него беше голема гордост која ја издигна од мали нозе и ја донесе рамо до рамо со неколкуте моќни компании во државата. Во Стентон Градба беше столб и двигател на фирмата, неуморен водач, посветен управител, авторитет и истовремено добар пријател со неговите вработени, кои во него гледаа заштитничка фигура и решение за сите професионални препреки.

За успех во претприемништвото сметаше дека е пресудна добрата комуникација со луѓето, но и чесноста како најбитна морална вредност кај човекот.

Пецо Стојаноски беше сопруг, дедо и татко на два сина.